Никита Бояркин: «Қорғаныста тәртіппен ойнадық, соққыларды бөгедік, азшылықта да жақсы әрекет еттік»

Никита Бояркин «Амурға» қарсы матчта қарсыластың барлық 34 соққысын қайтарып, осы маусымда алғаш рет «құрғақ» ойын өткізді. Барыс қақпашысы Хабаровскідегі жеңістен кейін өз әсерімен бөлісті.

- Никита, есепке қарасақ, Шанхайдағы ойын мен «Амурмен» өткен матч мүлде екі түрлі болды.

- Иә, ең алдымен командалардың ойыны әртүрлі болды деп айтар едім. Біздің команда да, қарсыластар да басқаша ойнады. «Амурмен» матчта біз қорғаныста барынша жинақы әрі ұқыпты әрекет еттік. Ал Шанхайда ойын көбірек көрерменге арналған, эмоцияға толы болды. Голдар да, төбелестер де көп болды. Сол жерде қақпашыларға қиындау болған шығар. Ал Хабаровскіде бапкердің тапсырмасын көбірек орындадық.

- Бұл маусымдағы алғашқы «құрғақ» ойының. Ол қалай қалыптасты деп ойлайсың?

- Меніңше, барлығымыз барынша аз қателік жібердік. Қорғаныста тәртіппен ойнадық, жігіттер соққыларды жиі бөгеді. Аз құрамда да жақсы әрекет еттік. Кей сәттерде мен шайбаны сәтті қайтара алдым немесе ұстап алып, ойынды дер кезінде тоқтаттым. Екінші кезеңде Кирилл Савицкий қақпамыз алдындағы қауіпті сәтте шайбаның жолына өзін тастады. Сондықтан мен оны матчтың үздік ойыншысы деп атауды жөн көрдім (күліп).

- Хабаровскіде қатарынан сегіз матчта жеңілген едіңдер. Осы туралы білдің бе?

- Жоқ, шынымды айтсам, мұндай серия туралы ешкім білмеген сияқты, ойымызда да болған жоқ. Ең алдымен, біз оларға плей-оффқа таласты жалғастыру үшін жеңіс өте қажет екенін түсіндік. Бірақ біз де ойынға жақсы дайындалдық. Әркім өз жұмысын атқарды және біз командалық жеңіске жеттік.

Достарыңызбен бөлісіңіз