Барыс басшылығы әр жас санатындағы БЖСМ тәрбиеленушілерінің ата-аналарымен кездесті

«Барыс Аренада» клуб басшылығы мен жаттықтырушылар алғаш рет «Барыс» БЖСМ-нің әр жас санатындағы тәрбиеленушілерінің ата-аналарымен жан-жақты кездесу өткізді. Ашық форматтағы диалог барысында менеджмент маусым қорытындыларын шығарып, қатысушылардың сұрақтарына жауап берді және жаттығу үдерісіне енгізілген жаңашылдықтарды таныстырды.

2025/26 жылғы маусым мектеп үшін табысты болды. «Барыс» жастар командасы көшбасшылық орнын қайта иеленіп, өз тарихындағы алтыншы Jastar Ligasy чемпиондығын жеңіп алды. Ресейдің Жасөспірімдер хоккей лигасында өзінен бір жас үлкен қарсыластармен сынға түскен «Барыс-2009» жетінші орынға тұрақтады. Ел біріншілігінде БЖСМ-нің алты командасының бесеуі өз жас санаттарында Қазақстан чемпионы атанды. Сондай-ақ төрт ұжым Орал, Сібір және Приволж федералдық округтері біріншілігінің ең мықты «А» дивизионындағы орнын сақтап қалды.

Спорттық нәтижелерден бөлек, клуб мұз айдынындағы жаттығу көлемін арттыру мәселесін де көтерді. Қазіргі таңда Қазақстан хоккей федерациясымен бірлесіп, мектеп командалары жаттыға алатын мұз айдындарының санын көбейту бағытында белсенді жұмыс жүргізіліп жатыр.

Сәкен Мұсайбеков, «Барыс» клубының бас директоры:

– БЖСМ-ді дамыту – клуб жұмысындағы басты бағыттардың бірі. Өткен ауыр маусымнан кейін біз бірқатар өзгеріс енгіздік: әр жас санатына арналған жаттығу жүйесін әзірлеп, барлық қажетті жаттығулар мен жүктеме көлемінің орындалуын қадағалайтын әдіскер маман шақырылды. Әр жас тобымен мұзда да, залда да даму жөніндегі жаттықтырушы жұмыс істейді. Бұдан бөлек, барлық балалармен сырғанау техникасы бойынша жаттықтырушы мен соққы жасауға жауапты бапкер қосымша сабақ өткізеді, сондай-ақ жалпы дене дайындығына арналған жаттығулар да жаңартылды. Осы мәселелердің барлығын ата-аналармен ашық талқыладық. Мұндай кездесулер өскелең ұрпақтың дамуы үшін екі тарапқа да өте маңызды деп есептеймін. Біз өз жоспарымыз бойынша жұмыс істеп жатырмыз, алайда жүйеде әлі де жетілдіретін тұстар бар, алда бірнеше жылға жететін жұмыс күтіп тұр.

Достарыңызбен бөлісіңіз