Снежные Барсы - Омские Ястребы матчы алдында

«Снежные Барсы» Пермьдегі алғашқы жеңісінен кейін қыркүйектегі үйдегі сериясын «Омские Ястребыге» қарсы матчпен бастайды.

Омбылықтар үйдегі сериясын «Сибирские Снайперыге» қарсы кездесумен аяқтады. Алаң иелері буллиттер сериясында 3:2 есебімен жеңіске жетті. Негізгі уақытта Егор Трофимчук пен Роман Ламан шайба соқса, Богдан Косенко жеңіс буллитін орындады. Бұған дейін Александр Павлов ойыншылары «Стальные Лисы» командасымен екі матч өткізіп, екі кездесуде де қонақтарға жол берді. Алғашқы ойында 3:5 есебімен жеңілген «Омские Ястребы» сапында Леонид Левченко дубль жасады, ал Кирилл Бурмистров бір шайба соқты. Екінші матчта 1:2 есебімен жеңіліп, командадағы жалғыз шайбаның авторы Богдан Косенко атанды.

Астаналықтармен кездесер алдында «Омские Ястребы» Алтын дивизионның турнир кестесінде 5 матчтан кейін 3 ұпай жинап, соңғы орында тұр.

«Снежные Барсы» қысқа мерзімді сырт алаңдағы сериясын Пермьде аяқтап, «МХК Молотпен» екі кездесу өткізді. Алғашқы ойында қонақтар 1:4 есебімен жеңілді. «Барыстар» сапындағы жалғыз шайбаны Тимур Миндубаев соқты. Екінші матчта Ильгиз Нуриев шәкірттері 4:3 есебімен жеңіске жетті. Михаил Коленко мен Рауан Қайыржан Лигадағы алғашқы шайбаларын соқты. Қайыржан дубль жасаса, «барстардың» жеңіс голын Тимур Миндубаев соқты.

Пермьге аттанар алдында астаналық ұжым өз алаңындағы соңғы матчын «Локо-76»-ға қарсы өткізіп, буллиттер сериясында 1:2 есебімен жеңіліп қалды. «Барыстардың» жалғыз шайбасын Илья Громов соқты. Бұл оның Лигадағы алғашқы голы болды.

Бүгінде «Снежные Барсы» Күміс дивизионның турнир кестесінде 5 матчтан кейін 4 ұпай жинап, 6-орында келеді.

Матч Қазақстан уақытымен 19:00-де басталады.

Билеттерді біздің сайттан және Яндекс Афишадан сатып алуға болады.

Тікелей трансляцияны КХЛ ТВ арнасынан тамашалауға болады.

Достарыңызбен бөлісіңіз