Снежные Барсы - Белые Медведи матчы алдында

Астаналық команда Алтын дивизион өкілдеріне қарсы өз алаңындағы ойындар сериясын жалғастыруда. Бүгін Антон Васиннің ойыншылары челябинскілік «Белые Медведи» командасымен кездеседі.

Қарсылас команда өз алаңындағы сериясын «Локо-76» және «АКМ-Новомосковск» клубтарына қарсы жеңістермен аяқтаған. Ярославль командасына қарсы өткен ойында алаң иелері овертаймда 3:2 есебімен жеңіске жетті. Бұл кездесуде Роман Кожевников пен Артемий Кулагин көзге түссе, шешуші шайбаны Владимир Сивирчуков соқты. Ал келесі матчта «АКМ-Новомосковск» командасына қарсы Дмитрий Шульга шәкірттері 7:0 есебімен сенімді жеңіске жетті. Бұл ойында Артемий Кулагин дубль авторы атанды.

Астанаға келгенге дейін «Белые Медведи» турнирлік кестеде 8 матчтан кейін 8 ұпай жинап, 8-орында тұр. Соңғы бес ойында команданың көшбасшысы Ярослав Федосеев 8 ұпай (2+6) еншілеген.

«Снежные Барсы» өткен ойында өз алаңында «Стальные Лисы» командасына 0:5 есебімен есе жіберді, алайда бірнеше нақты голдық сәттер жасаған еді. Бұған дейін астаналықтар Нижнекамскіде өткен екі матчта 0:5 және 1:4 есебімен ұтылған болатын. Сол кездесулердегі жалғыз шайбаны Александр Симахин соқты.

Бас бапкердің айтуынша, команда әзірге өз мүмкіндіктерін толық пайдалана алмай отыр, бірақ ойын құрылымы, жаттығу тапсырмаларын орындау және өздерін толық арнау тұрғысынан сын жоқ. Жұмыс әрі қарай жалғасады.

Қазіргі уақытта «Снежные Барсы» Күміс дивизионның турнирлік кестесінде 2 ұпаймен 8-орында тұр. Соңғы бес ойында команданың үздігі болып Роман Двуреченский қалып отыр, оның қоржынында 6 ұпай (3+3).

Достарыңызбен бөлісіңіз