Барыспен бірге спорт күні

Елордадағы Ботаникалық бақта «Барыспен» бірге спорт күні өтті. Клубтың серіктесі «Туризм және спорт индустриясын қолдау қоры», Астана қаласы Есіл ауданының әкімдігі және кезекші жедел жәрдем көлігін ұсынған Prime Green Clinic медициналық клиникасының қолдауымен ұйымдастырылған спорттық іс-шараға 400-ге жуық адам қатысты.

Жанкүйерлермен бірге өткен спорттық жаттығуларға «Барыс» хоккей клубы мен Қазақстан ұлттық құрамасының ойыншылары қатысты. Әділ Бекетаев, Дінмұхамед Қайыржан, Ансар Шайхмедденов, Самат Данияр, Әлихан Әсетов, Кирилл Панюков және Кирилл Савицкий футбол, баскетбол, пилатес, волейбол және теннис бойынша өз шеберліктерін көрсетті.

Әр спорт түрінде үздік нәтиже көрсеткен қатысушыларға ойыншылар Barys Store фирмалық атрибутика дүкеніне жеңілдік промокодтарын табыстады.

Спорттық ойындар аяқталғаннан кейін автограф-сессия ұйымдастырылып, оған келген әрбір жанкүйер сүйікті хоккейшісімен жүздесіп, естелік суретке түсу мүмкіндігіне ие болды.

Достарыңызбен бөлісіңіз