Металлург – Барыс матчы алдында

«Барыс» өздерінің сырт алаңдағы ойын сериясын қазіргі тұрақты чемпионаттың көшбасшысы «Металлургқа» қарсы кездесумен жалғастырады.

Өткен турда магнитогорлықтар өз мұз айдындарында «Авангардтың» қақпасына 60 дәл бағытталған соққы жасады, алайда 1:3 есебімен жеңіліп қалды. Никита Серебряков қорғаған қақпаны тек Сергей Толчинскийдің соққысынан кейін ғана ала алды. Илья Набоков 27 сейв жасады. Андрей Разин мұндай ойындарда тәртіп бірінші орынға шығатынын атап өтіп, оның ойыншылары жіберген орынсыз қателіктер голдарға алып келгенін айтты. 

«Болатшылар» 31 матч нәтижесінде 48 ұпай жинап, 119 шайба соқты. Бұл Лигадағы ең үздік көрсеткіштердің бірі. Владимир Ткачёв (8+32) – чемпионаттың басты бомбардирі әрі ең нәтижелі ассистенті. Роман Канцеров КХЛ үздік снайперлер тізімінде бірінші орында тұр (19 гол). Робин Пресс (2+22) – қорғаушылар арасындағы бомбардирлердің үздік бестігіне кіреді. Жарақат алғандар қатарында шабуылшы Андрей Козлов бар.

«Барыс» бейсенбі күні Уфада өткен нәтижелі кездесуде «Салават Юлаевтан» 4:7 есебімен жеңілді. Астаналықтар сапында Макс Уиллман дубль жасады, Майкл Веккьоне мен Райли Уолш бір-бір шайбадан соқты. Уолш пен Веккьоне нәтижелілік көрсеткіші бойынша қайтадан теңесті (екеуі де 8+14). Екі нәтижелі пас берген Всеволод Логвин жалпы 10 (4+6) ұпайға жетті. Артём Королёв осы маусымдағы алғашқы ассистін жасады. Андрей Шутов қақпаға бағытталған 28 соққыны тойтарғанымен, бас бапкер Михаил Кравец ойыншылардың қажетсіз ереже бұзушылықтарына көңілі толмағанын айтты, себебі бұл қарсыластарға ойынға қайта оралуға мүмкіндік берді.

Қазақстандық команданың қоржынында 31 матчтан кейін 27 ұпай бар. Алдағы кездесуге Джейк Массидің оралуы күтіледі, ол сырқаттанып, өткен ойынға қатыса алмады. Уфада қарсылас соққысын өз денесімен тосып, жарақат алған Майкл Веккьоненің бүгінгі матчқа қатысуы әзірге белгісіз.

«Металлург» - «Барыс» кездесуінің басталуы Астана уақытымен 16:30.

Матчтың тікелей трансляциясы Qazsportтелеарнасында көрсетіледі.

«Барыс» ХК бас серіктесі – «Самұрық-Қазына «ҰӘҚ» АҚ

«Барыс» ХК серіктесі – «Туризм және спорт индустриясын қолдау қоры» КҚ

Достарыңызбен бөлісіңіз